بسم الله الرحمن الرحيم
الحمد لله رب العالمين
نحمده ونشكره ونصلي ونسلم ونبارك علي خير البرية خاتم الانبياء والمرسلين رسول الله رحمة العالمين سيدنا وحبيبنا محمد وعلي آله وصحبه اجمعين
المشاعر الايام دي سلبية لاقصي درجة
كم رهيب من الغضب
غضب من وعلي البلد
غضب من الحاكم
غضب من المحكوم
غضب من الناس بس مش كلهم
غضبانة مني
غضبانة علي اللي بيتقتلوا كل يوم في كل حتة
غضبانة علي اللي بيموتوا بدون ذنب
غضبانة علي الاهانات والتعذيب والذل والمهانة
غضبانة من كتر من المرمطة اللي بتحصل للناس في كل حتة
غضبانة من الظلم
مفيش حاجة ليها طعم
لا حب ولا ضحك ولا اي احاسيس
مفيش في حلقي الا طعم المرارة والغضب
غضبانة مني علشان مش بعمل حاجة لحد
غضبانة من الشيوخ اللي مش بيقولوا الحق ويرضوا ربنا
غضبانة من كل اللي بيحكم علي غيره بالموت لمجرد انه مخالف ليه
غضبانة من اللي فاكر نفسه ماسك صكوك الغفران وفاكر انها حمياه من العقاب
غضبانة من الدنيا دي
راحت فين الرحمة والانسانية
ليه الناس توحشت كده
ليه المصلحة بقت اهم عندنا حتي وفي بينا دم سايل و بريء طلعت روحه مهما كانت معتقداته ايه
مش مهم يا انسان نظرتك للانسان تحترمه ولا ترفضه بس المهم تعرف انه روح مخلوقه ملك لخالقها وحده هو بس يحكم ويحاكم
انت متسواش حاجة عند ربنا مهما عظم شأنك ولو تسوي عند الله شيء فهو بعملك انت بس وبتوفيق ربنا ولم ينعم عليك بالتوفيق علشان تقف ماسك كرباج للي رايح واللي جاي تقول دا يدخل ودا يخرج
ايه كم الظلم اللي فيكي يا دنيا دا
وليه الابن يخرج وميرجعش لحضن امه؟ في شرع مين الظلم دا كله يبقي حلال بين البشر
قدر الله و ما شاء فعل
واللي راح راح خلاص
بس فضل ما بينا قساوة و ظلمات في القلوب مش باينلها نهاية
ايه كم الشماتة دا في القتل والدمار
شمتانين في ايه؟ في الموت؟
هو الموت فيه شماتة؟؟؟؟؟؟؟؟؟؟؟؟؟؟؟؟
دا في الحياة الرسول قالك لا تشمت في حد وقول اللهم لا شماتة حتي لا يعافيه الله ويبتليك
محدش بيحس خلاص كده؟؟
نطلب من ربنا يرحمنا بانهي وش؟؟ بانهي بجاحة ؟؟ لما ابسط مشاعر الانسانية مبقتش موجودة خلاص
الله يلعن الظلم كمان وكمان
ويرزقنا شوية رحمة من عنده يغنينا بيها عن رحمة من سواه
حسبنا الله ونعم الوكيل
حسبنا الله قدام كل من أذانا
حسبنا الله قدام كل من ظلمنا
حسبنا الله لنفسي واهلي وبلدي وديني
حسبنا الله ونعم الوكيل
وارجع واقول " وما ربك بظلام للعبيد " و " يمكرون ويمكر الله والله خير الماكرين "
بكرة يقفوا قدام الديان سبحانه و تعالي و يسددوا الدين اللي عليهم و كل واحد ظلم وافتري يشوف هيقول ايه مبرر قدام الحق سبحانه وهو الرقيب علينا
اللهم احسن خاتمتنا وارحم ضعفنا يارب وارفع عنا الظلم
